Return to Questions About Kids Publications Page

Cov Lus Nug Txog Tub Ki

Thaum Kuv Tus Me Nyuam Raug “Txheeb Xyuas” Ho Txais Tau Li Cas?

Vim li cas cov me nyuam yaus ho tau “txheeb xyuas”?

Tam lis ib tug niam txiv, tej zaum koj yuav txhawj tias koj tus me nyuam yuav loj hlob li cas. Tej zaum koj yuav muaj tej lus nug tseem ceeb xws li: Vim li cas nws thiaj coj txawv dua cov me nyuam koj pom los? Vim li cas nws thiaj npau taws ua luaj, ntshai los sis chim tas li xwb? Tsis yog nws yuav tsum txawj hais lus lawm los? Nrhiav cov lus los teb rau tej lus nug txog koj tus me nyuam txoj kev loj hlob kuj yog qhov tseem ceeb. Thiab pib los soj ntsuam ntxhov npaum li cas mas yim huab zoo. Yog tus me nyuam ho muaj ib qho teeb meem los , koj yuav muaj cuab kav los daws tau thiab cob qhia kom nws loj hlob mus raws li siab xav.

Lub caij zoo li no, tej zaum koj yuav xav kom muaj kev txheeb xyuas koj tus me nyuam kom tiav seb puas teb tau tej lus nug, puas daws tau koj tej kev txhawj xeeb, thiab pab koj txiav txim seb yauv ua li cas. Vim cov niam cov txiv yog tus txiav txim siab thaum kawg rau lawv cov me nyuam, koj yuav tau to taub txog txoj kev taug hauv kev txheeb xyuas, thiab nug tej lus nug txog qhov koj paub tsis meej. Cov lus hauv qab no qhia rau cov niam cov txiv paub tias txoj kev txheeb xyuas yuav tshwm sim tau li cas.

Cov niam cov txiv lub luag hauj lwm

Cov niam cov txiv yuav tau koom tes nrog txoj kev txheeb xyuas kom tiav. Cov tub txawg xav tau qhov cov niam cov txiv paub, thiab cov tub txawg thiab cov niam cov txiv yuav tau los tshab txhais tej paus ntsis ntawm kev txheeb xyuas thiab nrhiav tej lus nug uas yuav tau muab coj los teb. Peb xav paub dab tsi tiag? Qhov teeb meem twg yog qhov yuav tau daws? Yuav txiav txim siab li cas, thiab qhov twg yog qhov yuav tau muab coj los ua qhov txiav txim siab? Cov niam cov txiv thiab cov tub txawg yuav tau muab cov lus nug no coj los sib tham.

Qhov loj tshaj plaws

Tsim nyog muab tej lus nug txog tus me nyuam thiab nws txoj kev loj hlob los hais. Qhov paub txog nws txoj kev loj hlob zoo yuav pab tau txoj kev npaj txheeb xyuas kom meej pem thiab yuav muab tau tej lus uas yuav teb tau rau cov lus nug. Yam twg yog yam peb paub tus me nyuam, tsev neeg, zej zog thiab kev cai coj, thiab qhov chaw nyob uas yog qhov pheej txhawm muaj tej kev txhawj xeeb tawm tuaj? Tej teeb meem ntawd puas yog tej uas yeej ib txwm muaj? Puas muaj tej yam hais txog qhov nws nyob los sis puas muaj tej keeb kwm uas yuav ua kom muaj qhov teeb meem ntawd? Tej teeb meem no tau muab coj los daws li cas ua ntej lawm thiab ho daws tau li cas?

Tej feem ntawm kev txheeb xyuas

Cov kev txheeb xyuas kom thoob uas yuav rau koj ntseeg siab tias tej cwj pwm coj los sis cov teeb meem tau muab coj los sau tag cia yam meej pem thiab tau muab coj los soj ntsuam tag lawm mas yeej siv sij hawm ntau thiab yuav txheeb xyuas ntau yam. Tej kev txheeb xyuas no yuav yog qhov tig los xyuas tej ntaub ntawv thiab tej lus sau muaj cia lawm, qhov los nrog coob tus tham txog tej keeb kwm thiab kev soj xyuas tas lawm, los yog yuav tau muaj kev soj xyuas tus me nyuam, thiab tej zaus, kuj yuav tau siv cov ntaub ntawv uas tau tsim tshwj zias los xyuas qhov teeb meem ntawd los xeem tus me nyuam. Yog muaj ntaub ntawv xeem, tej ntaub ntawv no yuav tsum yog cov tsim los raws li tus me nyuam lub hnub nyoog, raws li nws txoj kev loj hlob thiab nws txoj kev cai coj; yog cov tsim los raws li tus cwj pwm coj uas yuav muab coj los ntsuam, thiab tsim raws li cov lus nug nyob hauv txoj kev txheeb xyuas. Cov kev xeem no yuav tsum yog cov tub txawg uas tau xyaum ua los lawm thiab muaj ntaub ntawv pov thawj los xeem thiab los txhais qhov xeem tau. Thaum ho tsis paub meej los, cov niam cov txiv yuav tau nug cov tub txawg xyuas kev xeem no seb lawv ho txawj li cas thiab nug qhov siv tau ntawm cov ntaub ntawv xeem los sis nug txog txoj kev muab qhov xeem tau no coj los txhais tawm.

Qhov yuav tau los xyuas tshwj xeeb

Kev txheeb xyuas cov me nyuam mos thiab cov me nyuam yaus mas tsis yooj yim. Kuj zoo li qhov cov me nyuam tsis tau muaj cuab kav hais lus nrog lwm tus thiab tsis tau to taub. Cov laus los kuj tib yam li ntawd, lawv los yeej tsis muaj peev xwm nrog cov me nyuam tham tau thiab to taub tau tib yam nkaus. Thaum cov niam cov txiv thiab cov tub txawg faj tias tsam ua tau tej yam tsis raug raws li xav thiab tsam txawj tsis txaus, lawv yuav tau cia siab rau qhov lawv paub, lawv tej tswv yim, thiab qhov lawv pom tau los xyuas kom meej qhov lawv xam pom, thiab ua raws li qhov lawv tau kawm los mus ua.

Qhov yuav tshwm sim tawm tuaj thaum muaj kev txheeb xyuas thiab qhov yuav muab qhov txheeb xyuas tau coj los siv li cas ntawd yuav tsum ua raws li qhov tau “tso cai pom zoo”. Qhov tso cai no yog txoj kev pib taug raws txoj cai uas qhia rau sawv daws paub tias vim li cas thiaj muaj kev txheeb xyuas tawm tuaj. Tej no yog cov niam cov txiv feem xyuam los muab kev txiav txim siab kom meej pem rau lawv tus me nyuam, thiab yog cov tub txawg feem xyuam los qhia cov niam cov txiv kom paub meej txog qhov yuav ua tau thiab lwm txoj hau kev thaum sam sim muaj kev soj xyuas los sis muaj kev txheeb xyuas.

Qhov txheeb xyuas tau

Thaum txheeb xyuas tiav lawm, cov tub txawg yuav los xyuas qhov txheeb xyuas tau, xam xyuas seb qhov txheeb xyuas tau yuav txhais tau li cas rau tus me nyuam, thiab muab coj los qhia rau koj. Ua ntej tshaj, koj yuav tau xyuas kom tseeb tias koj to taub qhov teeb meem thiab txoj kev taug hauv kev txheeb xyuas thiab yuav tau nug qhov koj tsis paub meej. Kev tham txog qhov txheeb xyuas tau yuav tsum pab tau txhua tus uas muaj feem xyuam nrog to taub koj tus me nyuam tib yam, kom pom tau ua ke rau cov hom phiaj yuav muab los daws qhov teeb meem, thiab muaj lub siab koom ua ke los ua qhov zoo tshaj rau tus me nyuam raws li cov kauj nruam yuav tau ua mus kom txog cov hom phiaj ntawd.

Xaus cov lus

Kev txheeb xyuas yuav yog qhov muab coj los teb tau koj cov lus nug, pab daws koj txoj kev txhawj xeeb, xyuas kom pom meej tias koj tus me nyuam txoj kev loj hlob tsis ua li cas, thiab tshawb txoj kev pab uas yuav pab tau koj tus me nyuam. Yog cov tub txawg uas muaj feem nrog kev txheeb xyuas koj tus me nyuam txoj hauj lwm los ceev cia tsev neeg txoj cai, cov ntaub ntawv uas tsev neeg tsis pub muab qhia tawm rau lwm tus, thiab lawv yuav tsum paub tab txog txoj kev coj thaum pib kev txheeb xyuas mus txog thaum ua tiav lawm. Thiab, qhov tseem ceeb mas cov niam cov txiv thiab cov tub txawg yauv tau sib koom tes los xyuas kom meej tias cov uas muaj feem nrog txoj kev txheeb xyuas no to taub txoj kev taug no zoo lawm.

Tus sau yog: Thom Davis, Ph.D., Licensed Psychologist, Minneapolis, Minnesota

Xav paub ntau tshaj no

Yog xav paub txog kev txheeb xyuas thiab teeb meem kev loj hlob ntawm txhua tus me nyuam yaus, thov hu rau koj tus kws kho mob los sis Minnesota Children with Special Health Needs/MDH, tus xov tooj yog 1-800-728-5420.

Cov Lus Nug Txog Tub Ki muaj nyob hauv Web –

http://www.harristrainingcenter.org

los yog http://cehd.umn.edu/ceed

The Irving B. Harris Training Center thiab the Early Education and Development hauv Minnesota lub tsev kawm ntawv qib siab yog cov sib koom los tsim  cov lus nug txog tub ki. Minnesota lub tsev kawm ntawv qib siab yog qhov chaw muaj vaj huam sib luag rau txoj kev kawm ntawv thiab kev ua hauj lwm. Yog koj xav tau cov lus hauv daim ntawv no ua lwm hom los yog xav tau ntau daim ntxiv, thov hu rau tus xov tooj 612-624-4510.

What Does It Mean When My Young Child is “Assessed”? Hmong translation by Dao Xiong.

Copyright © 2004 by Center for Early Education and Development

These materials may be freely reproduced for education/training or related activities. There is no requirement to obtain special permission for such uses. We do, however, ask that the following citation appear on all reproductions:

Reprinted with permission of the Center for Early Education and Development (CEED), College of Education and Human Development, University of Minnesota, 40 Education Sciences Building, 56 East River Road, Minneapolis, Minnesota, 55455-0223; phone: 612-625-3058; fax: 612-625-2093; e-mail: ceed@umn.edu, web site: http://cehd.umn.edu/ceed.

Return to Questions About Kids Publications Page